मुम्बई(एजेन्सी) । आफ्नो स्वरले दर्शकको मन जितेका ६९ वर्षे गायक उदित नारायण झा हालका दिनमा सामाजिक सञ्जालमा चर्चाको विषय बनेका छन् । उनीसँग जोडिएको एक मिडियो अहिले सामाजिक सञ्जालमा भाइरल छ । जुन भिडियो एक कन्सर्टको हो ।
कन्सर्टमा आफ्नो सुपरहिट गीत ‘टिप–टिप वर्षा पानी’ गाउँदै गर्दा उनको छेउमा एक महिला फ्यान सेल्फी लिन पुग्छिन् । सेल्फी लिएपछि महिलाले उदितको गालामा चुम्बन गर्छिन्, त्यसपछि उदितले महिलाको ओठमै चुम्बन दिन्छन् । ती महिललाई चुम्बन दिएपछि उनी केही अन्य महिला फ्यानलाई अंकमाल गर्दै गालामा चुम्छन् ।
यो भिडियो क्लिप भाइरल भएपछि कैयौं सामाजिक सञ्जाल प्रयोगकर्ताले उनको हर्कतप्रति रोष व्यक्त गरेका छन् । कतिपयले भने उदितको समर्थन पनि गरेका छन् ।
यद्यपि उदितले घटनाबारे आफ्नो भनाई सार्वजनिक गरिसकेका छन् । ‘फ्यान यति पागल हुन्छन् नि हैन । हामी त्यस्तो छैनौं । हामी कुलिन व्यक्ति हौं । केही व्यक्तिहरु यसलाई बढावा दिन्छन् र यसमार्फत आफ्नो प्रेम देखाउँछन्’, उनले भनेका छन् ।
उनी अगाडि भन्छन्, ‘फ्यानलाई लाग्छ कि उनीहरुलाई कलाकारलाई भेट्ने मौका मिलिरहेको छ । यसकारण कोही हात मिलाउनका लागि हात बढाउँछन्, कोही हातलाई चुम्छन् । यो सब माया हो । यसमा धेरै ध्यान दिन आवश्यक छैन’, उनले भनेका छन् ।
त्यसो त उदितले स्टेजमा कसैलाई चुम्बन गरेको यो पहिलोपटक होइन । यसअघि पनि उनी यस किसिमको विवादमा मुछिएका छन् ।
उदित नारायण र गायिका अलका याग्निकको जोडी बलिउड संगीतमा हिट जोडीका रुपमा चिनिन्छ । दुवैले सन् ९० को दशकदेखि कैयौं सुपरहिट गीत गाएका छन्, जुन गीत आज पनि मान्छेहरु गुनगुनाउँछन् । जसमा ‘देखने वाले ने’, ‘दिल में दर्द सा’, ‘कहो ना प्यार है’, ‘जो भी कसमें खाई थीं’, ‘प्यार की कश्ती में’, ‘किसी डिस्को में जाएं’, ‘गोरे–गोरे मुखड़े पे’ जस्ता दर्जनौं सुपरहिट गीत छन् ।
रियालिटी शोको समय प्रायः दुवै गायकगायिकाबीच हँसी मजाक र नोकझोंक चलिरहन्छ । सामाजिक सञ्जालमा उदितले अलकाको गालामा चुम्बन गरेको एउटा पुरानो भिडियो पनि भाइरल भइरहेको छ ।
भिडियोमा एक गायन रियालिटी शोको मञ्चमा जब अलका गीत गाइरहेकी हुन्छिन्, त्यही बेला उदित उनको छेउ पुगेर गालामा चुम्बन गर्छन् ।
‘जसरी एक गायकको अर्को गायकसँग सम्बन्ध हुन्छन्, त्यस्तै सम्बन्ध मेरो अलकाजीसँग छ । तर अलका जब मसँग भेट्छिन्, त्यो बेला उनीसँग मेरो प्रेम अझ बढ्छ । त्यसकारण उनीसँग मजाक गर्छु, छेडछाड गर्छु’, उदित भन्छन् ।
सामाजिक सञ्जालमा उदितको हर्कतप्रति सामाजिक सञ्जाल प्रयोगकर्ताले सकारात्मक र नकारात्मक दुवै प्रतिक्रिया दिएका छन् । वन्दन गुप्ताले एक्समा ‘उदित नारायणले मिका सिंहलाई कडा टक्कर दिएका छन्’ भन्दै लेखेका छन् । त्यस्तै कृतिका शर्मा लेख्छिन्, ‘उदित नारायणले जुन हर्कत गरेका छन्, त्यो ती व्यक्तिको मुखमा थप्पड हो, जसले उनलाई आदर्श मान्छन् । एक स्टेजमा सम्मानित कलाकारका रुपमा असभ्यता प्रदर्शन गर्नु तपाईंको मानसिक स्थितिमा गम्भीर प्रश्न खडा गरेको छ ।’
त्यस्तै आईशाले लेखेकी छन्, ‘उदित नारायणले ठूलो गल्ती गरेका छन् । मेरो हृदयमा उनीप्रति ठूलो सम्मान थियो, तर कुनै युवतीलाई जबरजस्ती चुम्बन गर्नु अपराध हो । उनीविरुद्ध उत्पीडनको मुद्धा दर्ता गर्न आवश्यक छ ।’
त्यस्तै मोनिका सिंह लेख्छिन्, ‘उदित नारायणको रोग पुरानो हो । चर्चामा आज आयो ।’
यस्तै सेन नामका एक प्रयोगकर्ता लेख्छन्, ‘उसले (महिला फ्यान)ले पहिला चुम्बन गरेका हुन् । त्यसपछि उदितले गरे । तर उदित नारायण पुरुष हुन्, त्यसकारण गल्ती उनकै हो ।’
विकास बिश्नोई लेख्छन्, ‘उनको जिन्दगी हो । फ्यानलाई दुःख लागेन, हामीलाई किन लाग्नु । तर प्रश्न यो हो कि समाजमा के सन्देश दिइरहेका छन् हाम्रा दिग्गज कलाकार । त्यसमाथि पनि उदित नारायण जस्ता एक दिग्गज कलाकार यस्तो हर्कत गर्नु लज्जास्पद हो ।’
